Бақтыбек Жақсылықов №1 МГӨБ дәнекерлеушісі, спортты серік қылған, салауатты өмір салтын ұстанған жан. Үстел теннисінен болған облыстық сайыстан 1-орын алып, республикалық жарысқа жолдама алған болатын. Аталған жарыс Ақтау қаласында 20-23 маусым аралығында республикалық және халықаралық деңгейде өтті.
«Ресейдің Орынбор қаласынан, Өзбекстаннан, Алматы, Шымкент,Орал, Ақтөбе, Атыраудан келген небір мықты спортшылар қатысқан бұл сайыс ерекше әсерлі, шеберлік шыңдайтын үлкен дода болды»- деді күміс жүлдегер, әріптесіміз Бақтыбек. 40-49 жас аралығында болған жарысқа, 95 адам қатысып, солардың арасынан 2-орын алып, күміс жүлде алу-үлкен жетістік екені сөзсіз.
«Үстел теннисінің қандай ерекшелігі бар?» , «Спорттың осы түрімен қай кезден бастап айналыстыңыз?», «Балаңыздың үстел теннисіне деген қызығушылығы бар ма?»- деген сұрағымызға, жеңімпаз Жақсылықов «үстел теннисі-ептілікті, дәлдікті, жылдамдықты қажет етеді. Бұл спортпен мектепте жүргенде достастым. Баламды да осы спортқа баулып жүрмін. Жамбыл Атаниязов деген жаттықтырушысы бар»-деп жауап берді.Қазақтың «Әкеге қарап ұл өсер» дегені осы. Чемпионнан чемпионның тууы-заңдылық. Бақтыбекке «ұлыңыз өзіңізден оза шауып, олимпиада чемпионы болып, көк туымыз көкте желбіреп, әнұранымызды асқақтата берсін»- деп тілек айтамыз!
