19 наурыз, 2025
Табиғатты түлете келген ұлттық мейрам – Ұлыстың ұлы күнін компания жоғары деңгейде атап өтті.
№2 жұмысшы автобекеті аумағына ақ шаңқан киіз үйлер тігіліп, мол дастархан жайылды.
Мерекеге қала әкімі Жансейіт Қайнарбаев, қалалық мәслихат төрағасы Ғалым Байжанов, «ҚазМұнайГаз» ҰК АҚ Ақтау қаласындағы Өкілдігінің өндірістік қатынастар департаментінің директоры Аманғали Нұрдәулетов, бас директор Жанболат Саймағанбетов мен кәсіподақ төрағалары қатысты.
Ел азаматтары мұнайшыларға құтты болсын айтып, игі тілегін жеткізді.
Қадірлі ақсақал, ардагер мұнайшы Оралбай Ноғаев ақ батасын берді.
Жергілікті өнерпаздар қойылым қойып, сахна төрінен әсем ән мен тәтті күй төгілді. Құшақтасып, арқа-жарқа болған мұнайшылар бір-біріне жақсы тілегін жаудырды.
Думанда ұлттық ойын түрлерінен жарыс ұйымдастырылып, ұлттық киім байқауы өтті.
Ораза ұстаған жандарға ауызашар берілді.
