20 наурыз, 2025
Компанияға қарасты 16 басқарма еңбек ұжымы киіз үй тігіп, Наурыз мейрамын тойлады.
Қала әкімі Жансейіт Қайнарбаев, қалалық мәслихат төрағасы Ғалым Байжанов, «ҚазМұнайГаз» ҰК АҚ Ақтау қаласындағы Өкілдігінің өндірістік қатынастар департаментінің директоры Аманғали Нұрдәулетов, «Өзенмұнайгаз» АҚ бас директоры Жанболат Саймағанбетов пен кәсіподақ төрағалары әлеуметке ақжарма тілегін арнап, әр шаңыраққа құт пен береке тіледі.
Ұлыстың ұлы күні мерекесіне орай мұнай саласының дамуына қосқан орасан зор үлесі үшін бірқатар мұнайшы бас директордың Алғыс хатымен марапатталды.
– Жаңа жыл жақсылығымен келсін. Еліміз бай болсын. Қазыналы аталарымыз бен дана әжелеріміз аман болсын. Әрдайым биіктен көрініп, табыс пен жетістікке жете берейік, – деді бас директор.
Думанды кеш мерекелік концертке жалғасты. Сахна төрінде әннен шашу шашқан жергілікті өнерпаздар кеш көрігін қыздыра түсті.
Қысы-жазы өндіріс жұмысынан босамайтын мұнайшылар би билеп, айналасына мерекелік көңіл-күй шуағын шашты.
Тойдың керемет өткеніне әлеуметтік сала қызметкерлерінің үлесі зор екенін айта кеткен жөн.
Адам баласының ойы да, жаны да, ниеті де тазаратын әз-Наурыз мерекесі баршамызға құтты болсын, халайық!
