Маңғыстау облысы әкімдігімен жүзеге асырылып жатқан «Есірткісіз Маңғыстау» жобасы аясында құқық қорғау органдарының өкілі және психолог мамандар мұнайшылармен кездесті.
Кездесу барысында есірткінің түрлері мен зияны, оның алдын алу жолдары, сондай-ақ отбасындағы тәрбие мен бақылаудың рөлі кеңінен айтылды.
Маңғыстау облысы Полиция департаментінің Есірткі қылмысына қарсы іс-қимыл басқармасының жедел уәкілі полиция майоры Пердегүл Көбесінова:
«Қоғамда есірткіге қарсы иммунитет қалыптастыру үшін бәріміз белсенді болуымыз керек. Әсіресе отбасындағы тәрбие, баланы қадағалау басты назарда болуы тиіс», – деді.
Психологтар Гүлсін Бержанова мен Дәулетбике Жұмабаева салауатты өмір салтын қалыптастырудың маңызы, тәуелділікке апаратын факторлар және одан қорғану жолдарын түсіндірді.
Олар әрбір адамның психологиялық әл-ауқаты жақсарса, зиянды әдеттерге қарсы ішкі иммунитет қалыптасатынын атап өтті.
«Мұндай жағдайда тыйым емес, түсінік, махаббат қажет. Отбасындағы қолдау – бұл ең мықты профилактика», – деді мамандар.
