Шараға Өзен кен орнының ерекшелігін жетік білетін сала майталмандары Мұрат Құрбанбаев пен Аманжан Өтесінов, сонымен қатар компания басшылығы атынан бас директордың бірінші орынбасары Нұрбол Ділмағамбет қатысты.
Кездесу шынайы әңгімеге толы болды. 2000 жылдары компанияны басқарған Мұрат Ізбергенұлы еңбек жолын қарапайым операторлықтан бастағанын айтып, табандылық пен адал еңбектің әрдайым биікке жетелейтінін жеткізді. Ол жас буынға: «Ісін сүйген адам ғана мамандығының шыңына көтеріледі», – деген ой тастады.
Ал Аманжан Нұрғалиұлы геолог мамандығының қыр-сырынан сыр шертті. Өзен және Қарамандыбас кен орындарын жан-жақты зерттеп әрі жетік меңгерген ол кәсіби шеберлік тәжірибемен ғана келетінін баса айтты. Ардагер жастарға кен орынның ғұмыры ұзақ болуы үшін үнемі ізденісте болудың, оқудың, ғылыми жұмыспен айналысудың маңызын түсіндіріп, құнды ақыл-кеңесін берді.
Жас мамандар да өз кезегінде көкейдегі сұрақтарын қойып, аға буынның бай тәжірибесінен тағылым алды.
Мұнайшы мамандығының жауапкершілігі мен абыройын сезіндіретін мұндай шаралар жастардың бойына жігер беріп, кәсіби бағыт-бағдарын айқындауға сеп болады.
